Старшыня Еўракамісіі на сустрэчы са старшынём КНР заявіла, што расійская агрэсія супраць Украіны павінна быць спынена. Урсула фон дэр Ляен і прэзідэнт Францыі Эмануэль Макрон правялі перамовы з Сі Цзіньпінам у Парыжы. У адкрытай для СМІ частцы перамоў Урсула фон дэр Ляен заявіла, што Украіне патрэбны справядлівы і трывалы мір. Пасля перамоў Урсула фон дэр Ляен паўтарыла, што распачатая Расіяй вайна ва Украіне павінна скончыцца як мага хутчэй.
-Мы разлічваем на тое, што Кітай паўплывае на Расію, каб яна спыніла яе агрэсію супраць Украіны. Прэзідэнт Сі адыграў важную ролю ў абмежаванні безадказных ядзерных пагроз Расіі, і я спадзяюся, што ён працягне гэта рабіць.
Старшыня Сі Цзіньпін заявіў, што ЕС лічыцца прыярытэтам у знешняй палітыцы Кітая, і ён разглядае адносіны з ім у стратэгічнай і доўгатэрміновай перспектыве.
Тэма перамоў еўрапейскіх лідараў з кіраўніком КНР — у асноўным эканамічныя адносіны, асабліва ў кантэксце мытаў ЕС на кітайскія электрамабілі. Дыскусія датычыцца і вайны ва Украіне. Пасля Парыжу старшыня КНР накіроўваецца ў Бялград і Будапешт.
iar/ez